ROXAS CITY-Padayon ang ginapatigayon nga decontamination process sang mga katapo sang Bureau of Fire Protection ukonn BFP sa mga buluthuan sa banwa sang Panitan, Capiz.
Ini ang ginpahayag ni SFO2 Marlon Garbo, Municipal Fire Marshall sang Bureau of Fire Protection-Panitan Fire Station.
Suno kay Garbo nga walo sa 26 ka mga buluthuan sa Panitan ang natigayo nga na-decontaminate sang ahensiya.
Ginpahayag ni Garbo nga tinutuyo sini amo ang mapasiguro nga hilway sa virus ang mga buluthuan kasunod sang pagbukas sang klase sa Agosto 24.
Magluwas sa decontamination, magapatigayon man sang clean-up drive kag fire safety inspection kag rekorida sa mga buluthuan.
Dugang pa ni Garbo nga sa tion sang pagbukas sang klase magabantay ang BFP sa pagpatuman sang physical distancing sa mga buluthuan.
Samtang, ginpasalig naman ni Garbo ang may yara sang mga ginasuksuk nga mga PPE’s ang mga bumbero samtang nagapatigayon sang decontamination process agud masiguro nga wala sang may malatnan sang COVID-19 sa mga katapo sang BFP.
