ROXAS CITY – Naglab-ot na sa 14 ka mga indibidwal ang narekord sang Capiz Provincial Health Office nga nalukpan sang palupok sa probinsya.
Sa interview sang Bombo Radyo kay Ms. Jasmin G. Gallaza, RN Nurse II/ Provincial Violence and Injury Prevention Program (VIPP) Manager Capiz Provincial Health Office, iya ginpahayag nga kun mahimo, likawan gid ang pagpalupok sang firecrackers, pyrotechnics kag iban pa apisar nga tapos na ang holiday season.
Ini agud malikawan ang mga insidente kapareho sang firecrakers related injuries sa probinsya subong nga nagapangatubang ang pungsod sa COVID-19 Pandemic.
Suno kay Gallaza nga nakapagkit ang PHO sang 29 ka mga kaso sang firecrackers related injuries sang tinalikdan nga tuig 2019.
Sa karon padayon ang kampanya sang PHO nga Iwas Paputok subong nga tuig 2021.
Sa karon, may yara na sang (14) ka mga biktima sang palupok ang nabalhag sa probinsya nga ginalakipan sang (3) sa syudad sang Roxas, tig-duha (2) sa banwa sang Jamindan, Pontevedra kag Sigma samtang tig-isa naman sa banwa sang Panay, President Roxas, Ivisan, Mambusao kag Dumarao.
Kalakip sa mga ginamit sang mga nabiktima sang palupok amo ang boga, kwitis, five star, sparklers kag indi matumod nga palupok.
Malipayon man sini nga ginpahibalo nga mas manubo ang numero sang mga biktima sang palupok sa kapareho nga period kun ikumparar sang nakaligad nga tuig.
Samtang, nagapadayon sa gihapon ang monitoring sang Capiz PHO tubtob sa Enero 5, 2021.
