ROXAS CITY – Ginkakibot ni Vice Mayor Stephen Alayon nga ginpasakaan na ini sang complaint sa Office of the Ombudsman ni Mayor Christopher Andaya, bangud tubtob sa karon wala pa ini sang nabaton nga kopya sang nasambit nga reklamo.
Sa interview sang Bombo Radyo kay Vice Mayor Alayon, ginsiling sini nga para sa iya wala siya sang may ginkawat nga kuwarta sang pumuluyo kag wala ini sang makita nga malain sa iya ginbuhat nga pagpangahatag sang financial assistance sa mga Sigmahanon.
Sandig sa complaint ni Andaya, nasaad nga gingamit sang bise-alkalde ang MOOE nga pondo kag savings, kag gin-convert para sa financial assistance sang tuig 2020.
Apang, pahayag ni Alayon nga nag-agi sa proseso ang amu nga pagpanghatag sang FA bangud nakapirma ang Budget officer, Accountant kag sa Treasurer.
Indi man suno ini pag-aprubahan sang tatlo ka mga departamento kun iligal ang amu nga transaksyon.
Aminado man ini nga wala sang pondo para sa AICS ang office of the Vice Mayor kag Sangguniang Bayan, apang sang tuig 2020, sa iya matandaan nga nagpahayag ang Presidente nga kun ano nga pondo ang available, mahimo nga pagagmiton basta para sa COVID-19 related nga assistance.
Ginklaro sini nga ang gingamit niya nga pondo ang iya sang Vice Mayor’s office kag wala ini nagtandog sang pondo sang Sangguniang Bayan bangud imposible man ini nga matabo.
Matandaan nga nag-file sang complaint ang alkalde sang Sigma sang Setyembre 2021 batuk kay Alayon bangud sa ginaalegar illegal use of public fund nga nagdangat sa kantidad nga P265,800.
