ROXAS CITY – Diskumpiyado si Board Member Jonathan ‘Sonny’ Besa sa nangin sabat sang Department of Public Works and Highways’ angut sa problema sa ginaconstruct nga Sports and Cultural Center sa may Villareal Stadium.
Sa pagpakig-angut sang Bombo Radyo kay BM Besa, ginpahayag sini nga apisar gin-aku sang DPWH ang ila kasaypanan bangud ginsuguran lang ang nasambit nga proyekto nga wala sang nagakaigo nga building permit nagikan sa City Engineering Office, duda sa gihapon ini sa nangin proseso sang pagtukod sini.
Suno pa diri, nga bisan pa indi siya isa ka enhinyiro, nakahibalo gid ini sang mga rekisitos sa pagpatukod sang isa ka pasilidad ukon edipisyo kun sa diin importante gid ang pagsecure sang building permit kag ang pagsiguro sang structural integrity sini.
Ginklaro man ni Besa, nga mismo ang DPWH ang nagpauntat sa amu nga proyekto bangud natalupangdan nga may yara sang deperensya diri.
Nahinalaan man sa pagsinapol nga antes suguran liwat ang konstraksyon kinahanglan magsumiter ang ahensya sang nagakaigo nga dokumento kag revised design sa Sangguniang Panlalawigan nga ginpasalig naman nga hitsuhon sang DPWH.
Ginpahanumdoman man sini ang nasambit nga ahensya kag ang mga construction firm nga antes magsugod sa mga proyekto nga ginapondohan nagikan sa nasyonal siguraduhon nga masunod gid ang mga nagakaigo nga rekisitos kag proseso agud nga mangin legal ini kag malikawan ang pagkadelay kag pagkapalpak sang mga proyekto.
Ginpanindugan naman ni Besa nga sa bahin sang gobyerno probinsyal luyag lamang nila nga siguraduhon ang integridad sang ginatukod nga pasilidad agud nga kung gamiton ini sa ulihi indi ini mangin tunaan sang pagka-aksidente sang isa ka indibidwal.
