ROXAS CITY – Nagpaathag si Board Member Aldwin Cruz-am natuhoy sa isyu nga ginakaatubang sang anay staff sini sa iya opisina nga si Fernando Garcia Jr.
Sa interview sang Bombo Radyo sa nasambit nga opisyal, ginklaro sini nga wala sang kamatuoran ang nagalagaw nga istorya nga ginkunsinte ukon gintolerar sini ang sala nga nahimo sang iya anay nga staff nga si Garcia bangud sa pagkamatuod suno diri nga sang tinalikdan nga Mayo 8, 2023 antes pa nag-abot ang reklamo batuk kay Garcia sang Hunyo 9 sa talatapan ni Vice Governor James Magbanua, ginpapanaugan nya na ini sang suspensyon kag ginmanduan nga e-settle ang problema antes ini tugutan ng magbalik sa pagtrabaho.
Dugang pa sini nga antes paman niya ginpabalik sa pagtrabaho si Garcia sang Mayo 18, ginsiguro sini anay nga nahitso na ang ginaalegar falsification of documents nga ginhimo ni Garcia matapos sini nga gin-reproduce ang mga kopya sang barangay certificate of indigency nagikan sa Brgy. Poblacion Tacas kag medical certificate nagikan sa municipal health office sang Cuartero para sa pagpangayo sini sang bulig pinansyal sa nagbalatian sini nga lola sang tinalikdan nga Oktubre 2022.
Suno kay Cruz-Am iya nga gintawagan si Punong Barangay Flores sang Brgy. Poblacion Tacas kag ang midwife sang municipal health office nga amo ang gin-agrabyado ni Garcia kun sa diin ginkumpirmar sang mga ini nga nagpangayo na sang pasaylo si Garcia sa ila kag wala naman sila sang plano pa nga magpasaka sang kaso.
Gani ginkakibot nalang ni Cruz-am nga sang tinalikdan nga Hulyo 3, ginpahibalo ini nga may complaint nga nag-abot sa talatapan sang bise-gobernador sadtong Hunyo 9 batuk kay Garcia nagikan sa nasambit nga midwife rason nga wala na sini gin-renew ang kontrata ni Garcia nga kuntani ginaproseso na matapos ini magtakop sang Hunyo 30.
Klaro suno diri kay Cruz-Am nga wala sang pagtolerar sa iya nga bahin bangud ginhimo sini ang mga nagakadapat nga tikang matapos sini matukiban ang isyu natuhoy kay Garcia apang nagakanugunan lang ini sa nasambit nga staff bangud nakita man sini ang maayo nga pagtrabaho ni Garcia para sa paghatag sang maayo nga serbisyo sang iya opisina.
Mensahe ni Cruz-am nga antes kuntani maghaboy ukon magpalapta sang istorya nahanungod sa amo nga isyu, kuntani gin-usisa ini anay kung ano ang kamatuoran kay handa man ini nga magsabat.
