ROXAS CITY – Matigdas nga ginsabat sang Chairman sang Committee on Laws and Good Governance sang Sangguniang Panlalawigan ang ginbato nga tinaga sa iya ni Board Member Matthew Hachuela.
Suno kay Board Member Eleuper “Bulilit” Martinez, indi sini kinahanglan nga pakanubuon ang kaugalingon para lamang mangin ka-lebel sini si Hachuela.
Gindugang pa sini nga ginpataw-an lamang sini ang nangin pahayag ni Hachuela matapos nga nakalab-ot sa iya ang amo nga impormasyon.
Ginpabugal ni Martinez mas madamo ini sang may nahimuan kumparar sa nasambit nga Board Member.
Suno diri ginpakamaayo na lamang sini nga magpaukoy sa baylo nga sapakon ang patutsada sa iya ni Hachuela.
Ginkabig man ni Martinez nga wala sang pulos ang panugyan sa iya ni Hachuela nga magpakigkita ini sa isa ka psychiatrist.
Pabor man ini nga mag-atubangay sila ni Hachuela agud ma-estoryahan kag ma-plantsa ang konflikto nga nagapatunga sa ila nga duha.
Sa pihak nga bahin, ginpanginwala man sini ang alegasyon nga nagapa-endorso ini kay Mambusao Mayor Leodegario “Jun” Labao Jr., agud magpadalagan bilang Bise Gobernador sang probinsya sa 2022 election.
Nagbilin pa ini sang tinaga nga kinahanglan sang Capiz sang maayo nga bise gobernador nga magabulig kay Governor Esteban Evan “Nonoy” Contreras II agud mas mapaayo pa ang pagdumala sa probinsiya nga indi kaparehokay Vice Governor Jaime “Mitang” Magbanua.
