ROXAS CITY – Ginkalain sang buot sang Chairman sang Committee on Laws and Good Governance sang Sangguniang Panlalawigan ang nangin pagpang-atake ni Board Member Matthew Hachuela sa mga staffs kag opisina sini.
Suno kay Board Member Eleuper Martinez, ginaalegar nga gin-atake ni Hachuela ang mga staffs kag opisina sini sang tion nga nagtinir ini sa Metro Manila kag nakapauli lamang sang nakaligad nga bulan.
Dugang pa sini nga nasaad mismo sa internal rule sang Sangguniang Panlalawigan nga ginabawal ang pagpangguba ukon pagpang-atake sang isa ka Board Member sa kapareho man sini nga yara sa posisyon.
Ginpahayag ni Martinez, nga ginkwesyon pa ni Hachuela ang budget sini bilang isa ka Board Member.
Nagapati man ini nga posible ginhimo lamang ini ni Hachuela bangud sa paglaum nga gwapo ini ikumparar sa iya.
Ginkatingala sini kun ngaa wala pa maaprubahan kag subong lamang nagguha ang report ni Hachuela kun sa diin gin-apelar ini nakaligad sang 13 ka mga Board Members nga magpatigayon na lamang sang virtual meeting sang nakaligad nga Setyembre 30 nahanungod sa padayon nga pagmonitor sang COVID-19 cases sa probinsya.
Dugang pa sini nga wala ini nanamian sa gin-ubra nga Committee Report kag gintawag nga “incompetent” nga klase sang Board Member si Hachuela bangud sa sala nga format sa pagsulat sini.
Bangud sini naga-apelar ini nga mag-resign na sa pwesto si Hachuela kag kun mahimo pabakantehon na lang ang opisina sang Committee on Rules.
Ginpahayag sang nasambit nga Board Member nga sa tion nga magresign si Hachuela, nakita sini nga maubra ni Board Member Ricky Martin ang responsibilidad bilang panibag-o nga Chairman sang nasambit nga kumiteba.
Ginkaakig man sini ang pagpangsaligbat ni Hachuela sang tion nga naghaboy ini sang diskurso pribelihiyo.
Sa pihak nga bahin, magapadayon ang pagpasaka sini sang demanda kay Vice Governor Jaime “Mitang” Magbanua bangud sa pag-withhold sa Representation Allowance (RA) and Transportation Allowance (TA) ukon RATA sini.
Gindugang pa sini nga makaluluoy ang mga Board Members kun pasugtan kag paboran lamang si Magbanua nga mag-ubra sang kaugalingon sini nga layi.
