ROXAS CITY — Ginbanatan naman ni Board Member Eleuper Martinez si Mambusao Mayor Leodegario Jun Labao Jr., sa iya ginhatag nga privileged speech sa sesyon sang Sanggunian Panlalawigan.
Suno kay Martinez, wala sang kinamatarong si Labao nga kwestiyunon ini angut sa iya napatuman nga mga proyekto bilang board member sang segundo distrito sang Capiz.
Ginpahayag ni Martinez nga responsibilidad sang isa ka board member ang pagbalay sang layi kag ang pagreview sang mga ginpapasar nga layi sang kabanwahanan kag wala sila sang daku nga budget para magpatuman sang mga proyekto.
Apang suno pa sa iya nga apisar wala siya sang daku nga budget, nakahatag sa gihapon siya sang mga proyekto kaangay sang pagpanagtag sang mga water dispenser, monobloc chairs, tsinelas, pagpatigayon sang feeding program kag paghatag sang financial assistance sa mga pigado nga pamilya sa probinsiya.
Ginpanginwala man sini ang akusasyon ni Labao nga nagapauli lamang siya sa banwa sang Mambusao agud magpahubog.
Ginhangkat man niya si Labao nga mag-akto bilang isa ka alkalde kag indi magpakita sang bastos nga batasan kaangay sang wala paghatag sang respeto sa mga kababainhan.
Ginpanugyanan pa sini si Labao nga untatan ang pagpamulitika kag magtutok na lamang sa pagpa-umwad sang ila banwa.
Matandaan nga sa interview sang Bombo Radyo kay Martinez sang damlag lang, gintawag man sini nga kasubong isa ka “agi” si Labao .
