Mapinalanggaon.
Ini ang paglaragway ni Board Member Steve Contreras kay EJ Contreras kasunod sang pagka-imbolbar sang anak sa ginapahayag pagpanghimulos sa isa ka lady rider kag pharmacist in profession sa banwa sang Pontevedra, Capiz.
Sa interview sang Bombo Radyo Roxas kay Contreras (amay), tuman niya ka kilala ang batasan ni EJ rason nga ginkatingala sini kag ginkalain sang buot ang gina-atubang sa karon nga kontrobersiya sang anak.
Suno kay Contreras, wala sang bisan ano nga ginka-imbolbaran nga kaso si EJ sa pihak nga nakatatak na sa paminsaron sang tawo nga kilala ang ila pamilya sa probinsya.
Aminado man ini nga naga-inom ang anak apang ginpangiwala sini nga nagasulod sa iligal nga buluhaton.
Ginpahayag pa ni Contreras nga naistorya sini mismo ang anak kag nagdepensa nga indi matuod ang alegasyon.
Bilang amay, nagapati ini nga indi maubra ni EJ ang akusasyon sang biktima.
Sa pihak sini, naghinyo ini sa publiko nga hatagan lamang ang anak sang “Benefit of the Doubt” tubtob nga wala pa mahibaluan ang matuod.
Nagpasalig naman ini nga pananglitan nga mapamatud-an nga may sala ang anak, pagakumbinsihon nila ini nga boluntaryo nga magsungka sa mga otoridad kag atubangon ang nagakaigo nga panumbungon.
Apang sa karon, ginatugyan na lamang ni Contreras sa korte ang desisyon.
Nagapati naman ini nga magaguwa man sa ulihi ang matuod.
Ginpanginwala man sini nga nagapanago sa karon si EJ kasunod sang mga alegasyon nga “missing” ini matapos nga nahulog sa regular filing ang pagpasaka sang panumbungon batuk sa iya.
