ROXAS CITY – Yara na karon sa kostodiya sang Roxas City PNP ang ginaalegar bodyguard ni punong barangay Midelo Ocampo nga ginatudlo suspek nga nagluthang sa 18-anyos nga si Dave Adricula sang Barangay Milibili, sining syudad nga karon ginabulong sa ospital bangud sa pilas sa natuo nga tiil.
Pinaagi man sa pagpanikasog ni Kapitan Ocampo, nagsungka ang ginatudlo suspek nga si Steven Alloc 29-anyos sang Little Baguio sang nasambit nga barangay.
Sa inisyal nga imbestigasyon sang kapulisan, yara sa tiyangge ang suspek kaupod ang mga abyan kag naga-inum sang magpadulong man sa amo nga lugar ang biktima kaupod si Larry Vergara sang Barangay Dulangan, Pilar.
Nagtiaw-tiaw pa ang biktima sa suspek tobtob nagresulta naglab-ot sa indi pag-intiendihanay kag pagsumabaganay.
Nakadalagan pa ang biktima, apang ginlagas ini sang suspek kag ginluthang gamit ang .45 kalibre nga armas.
Narekober sang kapulisan sa ginluntaran sang insedente ang tatlo ka fired cartridges kag isa ka slug.
