ROXAS CITY, CAPIZ- Naka-onset na ang preparasyon para sa selebrasyon sang kapistahan ni Sr. San Juan de Bautista sa Barangay Baybay, Roxas City, nga gin-iskedyul halin Hunyo 20 tubtob Hunyo 24, 2025.
Sa interview sang Bombo Radyo kay Punong Barangay Erwin Oroceo, ginpahayag nga handa na ang barangay council kag ang nagkalain-lain nga ahensya para sa masinadyahon kag malinong nga pagdumdum sang pista.
Dugang ni Kapitan Oroceo nga nakig-coordinate na sila sa mga kapulisan, Philippine Coast Guard, barangay tanod, CDRRMO, kag TMU. Full force man nga naka-assign sa adlaw sang mga kalihokan ang mga tanod kag mga ahensya nga may kalabutan sa seguridad kag trapiko.
Isa sa mga highlight sang selebrasyon amo ang fluvial parade nga pagahiwaton sa baybayon sang amo nga barangay.
Samtang, may mga regulasyon nga ginapatuman sa amo nga kahiwatan kalakip sang: bawal ang mga menor de edad nga mag-upod, kinahanglan may life jacket ang tanan nga pasahero, ginadumilian man ang overloading, pagkarera, pagpalupok, kag pagsakay sang mga hubog.
Nahibaluan nga ang ruta sang fluvial parade magahalin sa Sr. San Juan sa Baybay, pakadto sa Punta Cogon, Culasi, Magtalinga, kag magatapos sa People’s Park, sa diin manaog ang patron.
Bukas man ang aktibidad sa tanan kag wala sang bawal sa pagbitbit sang mga rebolto.
Nagpahanumdom naman si Oroceo sa publiko nga maghalong sa pagdala sang gamit, e-check ang kondisyon sang mga motorbanca kun mag-intra sa fluvial parade, kag siguruhon ang pag-lock sang mga motorsiklo nga gina-park sa kilid sang karsada. Ginahingyo man niya ang tanan nga hinayan ang pagmaneho agud malikawan ang disgrasya sa dalanon.
With a report from Bombo Jessa Mae De Los Santos
