ROXAS CITY – Tuman ang pagpasalamat ni Dr. Leonel Abordo, Provincial Veterinarian matapos lunsay nagnegatibo sa African Swine Fever (ASF) ang baboy nga ginkuhaan sang blood samples sa Barangay Carida, Tapaz kag Barangay Aglimocon, kag Quinabonglan, Maayon.
Ini ang matapos nakabaton sang report ang Provincial Veterinary Office nga may nagkalamatay nga baboy sa mga nasambit nga lugar.
Sa interview sang Bombo Radyo kay Abordo, ginsiling sini nga apisar nagnegatibo ang mga nasambit nga lugar, nagapadayon sa gihapon ang ila monitoring kag surveillance sa mga backyard hograisers pananglitan makabatyag sang sintomas sang ASF ang ginahuptan nga baboy.
Nagapati ini, nga indi sa ASF ang rason sang pagkalamatay sang baboy posible gin-igo ang mga ini sang respiratory disease bangud sa malain nga panahon sang nanliligad nga bulan.
Samtang, ginakasubo naman sini ang pagpositibo sa balatian sang Barangay Poblacion Ilawod, Dumarao.
Wala naman suno diri sang dapat nga kabalak-an bangud may yara na sang tikang nga ginahimo ang Local Government Unit (LGU) agud matapna ang virus, pinaagi sa pag-quarantine sang baboy sa Poblacion Ilawod kag disinfection sa lugar.
Ginklaro man sini nga ang ASF ang isa ka sahi sang balatian nga naga-igo lamang sa baboy kag indi makahalit sa ikaayong lawas sang tawo.
Sa pihak nga bahin, ginahulat pa sang talapatan ang mangin resulta sang blood sample nga nagikan sa Barangay Tuburan kag Parallan, Maayon.
