ROXAS CITY – Natukiban sang Barangay Kagawad sang Barangay Bago, sini nga syudad nga indi lang motorsiklo sini ang ginkawat sang duha ka mga wala makilala nga kawatan sa sulod sang ila puloy-an, sa nasambit nga barangay.
Sa dugang nga ginpabalhag ni Brgy. Kgwd. Simplicio Baguio Jr., sa Roxas City PNP, nadula man ang iya wallet nga may unod nga P13,800, mga valid ID’s kag ATM card, kag dugang nga P800 cash nga unod sang coin purse.
Matandaan nga kaaganhon kahapon sang Sabado, sang ginpukaw ang Brgy. Kgwd. sang iya bata nga babayi nga bukas ang ila gate kag sa pagtsekyar sini, nakit-an niya ang duha ka mga lalaki nga nagapalagyo na nga ginasakyan ang Honda beat 110 sini nga motorsiklo.
Apang kaina sang aga, may nakatimbre sa Kgwd. nga nasiplatan ang iya motorsiklo sa may bahin sang Brgy. Bolo, sini nga syudad.
Nahibaluan nga wala na sang tabon ang makina kag tambutso sang nasambit nga motorsiklo.
Nagapadayon ang paghibalo sang mga kapulisan sa pagkakilanlan sang mga suspetsado.
