Ginsiguro sang Bangko Sentral ng Pilipinas (BSP) sa publiko ang padayon nga produksiyon sang kwarta nga papel kag mga coins sa tunga sang ginalauman nga mataas nga currency demand subong nga Christmas season.
Sa isa ka statement, ginpahayag sang BSP nga masami nga nagataas ang demand para sa bag-o kag malimpyo nga kwarta nga papel kag coins kun holidays bangud sa tradisyunal nga paghatag sang mga Pilipino sang mga regalo nga kwarta ukon aguinaldo para sa ila mga ihado ukon ihada, pamilya kag mga abyan.
Ginpanugyanan man sang BSP ang publiko nga libre ang pagpabaylo sang banknotes kag coins kalakip ang unfit currencies para sa bag-o nga cash sa mga bangko.
Ang mga unfit banknotes ang mahigko, may mantsa, may mga sulat, kag ugis nga letra samtang ang unfit coins naman ang may markings kag may atak. Ginganyat man sang BSP ang publiko nga ikonsiderar ang pagpadala sang e-Aguinaldo imbes nga pisikal nga kwarta.
Ang pagpadala suno diri sang cash gifts electronically ang convenient kag episyente kag nagadala sang mas inklusibo kag digital nga ekonomiya sang pungsod.
