Ginkumpirmar sang Philippine Air Force (PAF) nga ginalauman nga maga-abot sa pungsod ang suporta nga ginpreparar sang Estados Unidos agud magbulig sa relief response kag humanitarian assistance sang Armed Forces of the Philippines (AFP) sa mga tuman nga naapektuhan sang kahalitan nga gintuga sang Bagyong Dante kag Emong.
Suno kay PAF Deputy Spokesperson Maj. Joseph Calma, ang United States KC-135 aircraft nga may karga nga Humanitarian Assistance and Disaster Response (HADR) Equipment ang yara subong sa Japan.
Gin-athag ni Calma nga nagahulat lang ini sang signal for departure agud gilayon nga maka-take off kag makahugpa ang mga kagamitan sa Clark Airbase sa Pampanga.
Apisar nga ginalauman nga maga-abot ang amo nga mga kagamitan, wala gihapon sang eksakto nga petsa kag oras kon san-o mahimo nga maghugpa diri ang una nga bulig sang Estados Unidos.
Indi pa kumpirmado kun magapabilin sa pungsod ang eroplano bilang dugang nga bulig sa pagdul-ong sang relief goods sa mga biktima sang bagyo, apang ginpanindugan sang PAF nga bukas sila sa amo nga mga posibilidad.
Kasunod sini, ginkumpirmar man ni Calma nga may yara sila sang masobra 40 ka mga assets nga naka-standby para sa posible nga operasyon kag kon kinahanglanon ang dugang nga bulig sa relief operations.
Naka-standby na ang isa ka Sokol helicopter sa Clark Airbase sa Pampanga, samtang naka-standby alert naman ang pila ka mga S70i Black Hawks sa ila iban pa nga military facilities.
Ini nga mga kagamitan mahimo magamit para sa gilayon nga mga operasyon sa pagbakwit kag iban pa nga humanitarian nga bulig nga kinahanglanon sang publiko.
Samtang, ang paggamit sang amo nga mga assets kag equipment nagadepende sa gihapon sa kinahanglanon sang National Disaster Risk Reduction Management Council (NDRRMC) nga ginapangunahan sang Office of Civil Defense (OCD).
Magluwas sa humanitarian assistance kag evacuation operations, mahimo man suno sa iya magamit ang ila eroplano para sa rapid damage assessment kag needs analysis.
