Nagpahanumdom ang Bureau of Fire Protection-Capiz sa publiko nga maghalong sa paggamit sang palupok sa nagahilapit nga holiday season.
Sa interview sang Bombo Radyo kay Senior Fire Officer 1 Junemar Galve, Public Information Officer sang Bureau of Fire Protection-Capiz, iya ginpahayag nga naglunsyar man ang ila nga talatapan sang ‘oplan: paalala iwas paputok’ sa pagpahanumdom pinaagi sa flyers kag iban pa nga information dissimenation.
Suno kay Senior Fire Officer 1 Galve, kinahanglan nga magkuha sang permit ang mga manugbaligya sang palupok kag kinahanglan nga magsunod sa mga safety standards kaangay sang pagbutang sang drum nga may tubig, balde nga may balas kag pagpahamtang sang fire extinguisher malapit sa lugar agud nga may magamit sa tion nga may magluntad nga insidente sang sunog.
Pahayag pa niya, hugot man nga igabawal ang pagbaligya sang palupok sa mga menor de edad agud malikawan ang insidente sang mga nalukpan kun sa diin ang mga nasambit nga indibidwal ang masami biktima.
Nagpanawagan man ang natungdan nga kun mahimo, likawan na lang ang paggamit sang palupok kag maggamit na lang sang mga alternatibo kaangay sang torotot.
