Nagsumiter man sang courtesy resignation ang Bureau of Internal Revenue (BIR) Commission Romeo Lumagui Jr. kag Bureau of Customs (BOC) Commissioner Bienvenido Rubio.
Ini bisan pa nga mga katapo lamang sang Gabinete kag mga opisyales nga may ranggo nga tiglikom ang nalakip sa panawagan ni Presidente Ferdinand Marcos Jr. para sa ila pagrepaso sang performance.
Sa iya opisyal nga pahayag, ginpahayag ni Comm. Lumagui nga lubos niya nga ginasuportahan ang panawagan sang Presidente para sa accountability sa serbisyo publiko.
Ginsiling sini nga maga-resign siya sa iya posisyon bilang Commissioner of Internal Revenue agud mahatagan sang hilway nga kamot ang chief executive sa pag-evaluate sang iya performance agud mapasanyog ang serbisyo publiko sa idalum sang administrasyon.
Suno sa opisyal, nagakabagay kag nagakaigo ang pagpanghangkat sang Presidente agud i-align ang gobyerno sa ginalauman sang pumuluyong Pilipino.
Ginpasalamatan man sini ang Presidente sa pag-appoint sa iya bilang pinuno sang BIR.
Samtang amo man ang panimuot ni Comm. Rubio sa pagsumiter sang iya courtesy resignation agud mahatagan sang kahilwayan ang Presidente sa pag-assess sang performance sang mga pinuno sang mga ahensya kag mapasanyog ang serbisyo sa pumuluyong Pilipino.
Ginakabig man sini nga dako nga kadungganan ang makaserbisyo sa mga pumuluyo. Ginsiling sini nga magapabilin siya nga bug-os nga suportado sa mga polisiya kag reporma sang Presidente para sa kauswagan sang pungsod
