Buwa sang niyog sa sulod sang kapayas, agaw-atensiyon sa Capiz

ROXAS CITY – Agaw-atensiyon sa karon sa Capiz ang bunga sang puno sang kapayas sa isa ka barangay sa probinsiya nga kasubong gintubuan sang buwa sang niyog sa sulod.

Isa ka netizen ang nagpalab-ot sang mga laragway sa Bombo Radyo sang bunga sang kapayas gikan mismo sa ila nga tanom.

Suno sa netizen, ginpupo nila ang bunga sang puno sang kapayas para kuntani ibaligya apang natingala sila bangud matig-a ini apisar nga luto na.

Ginkakibot sang mga ini sang ginbuksan ang bunga sang kapayas bangud nakit-an nila ang puti nga kasubong buwa sang niyog.

Suno diri nga first-time sini nga makakita sang kapareho sini nga bunga sang ila tanom nga puno sang kapayas rason nga gilayon nila nga ginpalab-ot ang mga laragway sa Bombo Radyo.