ROXAS CITY – Ginpalawig pa sang Capiz Electric Cooperative, Inc., ukon CAPELCO ang due-date sa pagbayad sang electric bill para sa bulan sang Setyembre sang pito ka-adlaw para sa mga kunsomidor sa siyudad sang Roxas.
Sa interview sang Bombo Radyo kay General Manager Engr. Edgar Diaz nga ginapatuman subong sang ila talatapan ang skeletal workforce sa mga empleyado humalin subong nga adlaw sang Lunes, Setyembre 21.
Kasunod ini sang pagpositibo sa Coronavirus Disease ukon COVID-19 sang ila empleyado rason nga ginpasarado ang nasambit nga talatapan.
Bangud diri, wala na ini nakatrabaho humalin sadtong Setyembre 8 sumugod nga naglain ang iya pamatyag.
Magluwas diri, ginpahayag ni Diaz nga magapatigayon sila sang disinfection kag padayon naman ang pagpatigayon sang contact tracing sa mga indibidwal nga nakahalubilo sa nagpositibo.
Dugang pa sini nga ginmanduan man ang mga ini nga magpaidalom sa 14 day quarantine period.
Matandaan nga una na nagpapanaog sang memorandum nga nagamando sa tanan nga empleyado nga magfill-out sang health declaration form sa ila pag-duty kag ginahatagan man ang mga ini sang face mask kag face shield.
Dugang pa sini nga wala niya ginapa-trabaho ang mga empleyado kun maglain ang pamatyag.
Samtang, hugot sa gihapon nga ginapatuman sang CAPELCO ang mga minimum health protocol kapareho sang pagsuksok sang face mask kag face shield antes makasulod sa nasambit nga talatapan.
