ROXAS CITY – Nagpa-athag ang pamunuan sang Capiz Electric Cooperative (CAPELCO) natuhoy sa mga ginareklamo sang mga konsumidor nga pagpang-utod sang linya sang kuryente sa mga wala makabayad.
Suno kay CAPELCO General Manager Engineer Edgar Diaz, mahimo magdangop ang isa ka konsumidor sa ila talatapan pananglitan nga gin-utdan sila sang kuryente nga wala sang ginpadala nga notice of disconnection.
Ginpahayag ni Diaz nga kun mapamatud-an nga wala makadul-ong sang notice of disconnection ang isa ka meter-reader antes ini nagpang-utod, mahimo siya magpangatubang sang nagakaigo nga penalidad.
Suno diri nga madugay na nga polisiya sang CAPELCO ang pagpang-utod sang kuryente sa mga wala makabayad antes ukon sa adlaw mismo sang due date.
Magluwas diri, nagahatag ang CAPELCO sang 48-oras sa mga kunsomidor nga wala nakabayad sang ila nga kuryente antes ang mga ini utdan.
Ginpahayag ni Diaz nga kinahanglan nila nga magpanukot sa mga konsujmidor bangud nagabayad lamang sila sa nagasuplay sa ila sang kuryente kay ang CAPELCO ang isa lamang ka distributor.
Ginpanindugan pa ni Diaz nga obligasyon sang tagsa ka konsumidor nga magbayad sang ila kuryente.
Ginaganyat man sini ang mga konsumidor nga magreklamo sa ila talatapan kun may yara sang nakita nga kapaslawan sa ila nga mga personnel.
Ginkompirmar man ni Diaz nga may yara sang mga pagpamahog sa ila nga mga personnel sa tagsa nga sila ang magpang-utod sang kuryente sa mga konsumidor nga wala makabayad.
