ROXAS CITY – Nagpaathag ang pamunuan sang Capiz Electric Cooperative (CAPELCO) natuhoy sa patigayunon nga power-interruption sa Sabado nga adlaw, Nobyembre 16, sa siyudad sang Roxas kag mga kabanwahanan sa probinsiya sang Capiz.
Suno kay CAPELCO general manager Engr. Edgar Diaz, ang nasambit nga power-interruption ang bangud sa patigayunon nga upgrading sang National Grid Corporartion of the Philippines (NGCP).
Ginpahayag sini nga maga-install sang bag-o nga mga circuit breaker ang NGCP sa ila nga substation sa banwa sang Panit-an.
Bangud diri suno kay Diaz, may yara sang power interruption sa siyudad sang Roxas humalin alas 6 tubtob alas 9 sa aga.
Samtang sa amo man nga adlaw, may power-interruption man sa tanan nga kabanwahanan sa probinsiya humalin alas 6 sa aga tubtob alas 2 sa hapon.
Ginpahayag ni Diaz nga tuman ka importante ang patigayunon nga upgrading sang NGCP agud maislan ang daan nga mga circuit breaker nga masami nagatrip-off sa tagsa ka may problema sa transmission line.
Suno pa kay Diaz nga nagpasalig man ang pamunuan sang NGCP nga mapabalik sa natalana nga oras ang kuryente sa Sabado nga adlaw ukon ila tinguhaon nga mapadasig ang upgrading agud mas temprano pa nga mapabalik ang kuryente.
Samtang gindugang pa ni Diaz nga wala sang ginalauman nga shortage sa power supply sa bulan sang Disyembre.
