ROXAS CITY – Liwat nga magabukas ang Capiz State University – Sapian Satellite Campus sa banwa sang Sapian, Capiz.
Ini ang ginkompirmar mismo ni Capiz 2nd district congressman Fredenil Castro sang mainterview sang Bombo Radyo.
Mahibaluan nga si Castro ang kabahin sang Board of Regents sang CAPSU.
Suno kay Castro nga sa ila nangin sinapol sang damlag lang, nahinalaan ang nasambit nga plano kaupod ang pamunuan sang CAPSU kag Commission on Higher Education.
Suno kay Castro nga nagapanikasog ini nga liwat nga mabuksan ang amo nga eskwelahan bangud nagapati siya nga madamo ini sang mabuligan nga mga ginikanan nga luyag nga mapatapos sa pag-eskwela ang ila mga kabataan.
Nalipay man si Castro bangud nahangpan sang alkalde sang banwa nga si Mayor Ike Biñas ang katuyuan sang amo nga plano bangud nagdonar ini sang masobra isa ka ektarya nga duta nga patindugan sang nasambit nga buluthuan.
Ginpahayag pa ni Castro nga may yara na sang pondo nga 40 milyones pesos nga gamiton para sa pagpatukod sang administration and academic building nga gikan sa Committee on Appropriations kag natugyan na sa pamunuan sang CAPSU.
Sa karon suno sa opisyal ginahikot pa ang Memorandum of Agreement (MOA) para sa pagtugyan sang CAPSU sang pondo sa Department of Public Works and Highways bilang implementing agency sa pagpatukod sang buluthuan.
Nagalaum naman si Castro nga mangin positibo ang resulta sang patigayunon nga public consultation para sa amo nga plano bangud madamo sini ang mabuligan indi lamang sa banwa sang Sapian kundi mangin sa kaiping sini nga mga kabanwahanan.
