ROXAS CITY-Ginkompirmar ni Capiz First District Representative Emmanuel Tawi Billones Sr. nga isa ini sa mga kongresista nga pabor para sa pagdeklarar nga provincial holiday ukon “ Ferdinand Marcos Day” ang Setyembre 11 sa probinsiya sang Ilocos Norte.
Sa interview sang Bombo Radyo kay Billones ginpahayag sini nga isa ini sa 197 ka mga kongresista nga nagpabor nga ideklarar nga “Ferdinand Marcos Day” ang Setyembre 11 sa probinsiya sang Ilocos Norte.
Nagapati si Billones nga sa pihak nga madamo sang nagapakamalaut sa anay presidente, madamo man ini sang mga nabuligan nga indibidwal ilabi na sa Ilocos Norte.
Ginpahayag man ni Billones nga wala sang “Party Stand” ang partido Liberal sa pagboto sa nasambit nga hagna.
Matandaan nga 197 ka mga kongresista ang nagpabor nga ideklarar nga “Ferdinand Marcos Day” ang Setyembre 11, samtang 9 ka mga kongresista ang wala nagpabor kag isa ang nag-abstain.
Sa pihak nga bahin, nagpasalig ang Department of Health Region-6 nga magapadala sang dugang nga mga medical frontliners sa probinsiya.
Sa pinakaulihe nga pagkig-angut ni Billones kay DOH Regional Director Marilyn Convocar ginpahayag sini nga nagpadala na ang DOH sang 5 ka mga nurses kag duha ka mga doctor agud mag-augment sa Roxas Memorial Provincial Hospital.
Ginpasalig ni Convocar suno kay Billones nga magapadala ang ahensiya sang dugang nga mga medical frontliners apang indi pa ini makapasalig kun pila ang kabug-osan nga numero nga ipadala sa probinsiya bangud nagahinyo man sang dugang nga mga medical frontliners ang iban nga mga kaprobinsiyahanan sa western visayas.
