ROXAS CITY – Hugot nga ginpamatukan sang mga residente sang Barangay Acbo banwa sang Sigma ang plano sang provincial government nga ginapahayag sanitary landfill.
Mahibaluan nga nagpatigayon sang protesta ang pila ka mga residente sa amo nga lugar.
Sa interview sang Bombo Radyo kay Nanay Salvacion Sonio nga nagpasugot sila bangud sa pagdumdom nila nga isa ka ecopark ang ipatindog sa ila barangay.
Apang, natukiban na lamang nga pagahimuon ini nga sanitary landfill rason nga madamo sang mga residente ang wala nagpabor nga himoon nga halabuyan sang basura ang ila nga lugar.
Suno kay Nanay Sonio nga nabalaka sila bangud sa malain nga epekto sang landfill, sa ikaayong lawas sang mga pumuluyo rason nga ila nadesisyunan nga magpatigayon sang protesta sa posible matabo kun madayon ang plano sang gobyerno.
Samtang, ginklaro naman ni Capiz Governor Esteban Evan Nonoy Contreras nga indi ini matawag nga sanitary landfill bangud isa ini ka Ecological Solid Waste Management kun sa diin makatuga pa ini sang madamo nga trabaho sa mga tawo kag mahimo nga tourist attraction.
Ginpahayag sang gobernador nga ang mga basura nga dal-on diri ang iga-recycle man ukon sarang mabaligya kag mahimo pa maggamit bilang organic fertilizer ukon farming gamit ang isa ka machinery sang technical working group.
Dugang pa sini nga dapat kuntani tanan nga mga LGU may yara sang tagsa ka mga Ecological Solid Waste Management Facility ang mga kabanwahanan agud indi na magtambak ang mga basura.
Mahibaluan nga isa na lamang ang kinahanglan sang probinsya agud mabakal ang duta nga patindugan sini amo ang resolution nga ipapasar sang Sangguniang Bayan sang amo nga banwa.
Apang, suno kay Contreras kun indi sila luyag nga matabo ini indi man sila pagpiliton sang provincial government kag iga-alokar nalang ini sa iban nga proyekto.
