Capiz Government and Business Center kag opisina sang BIR, napuhag sang separado nga ‘bomb threat’
ROXAS CITY – Naalarma ang mga empleyado kag customer sa Capiz Government and Business Center sa Barangay Tiza kag opisina sang Bureau of Internal Revenue (BIR) sa Barangay 3 matapos nakabaton sang separado nga ‘bomb threat’.
Una diri, gilayon nga nagresponde ang mga kapulisan sa business center matapos nakabaton sang magagmay nga papel ang head security sa nasambit nga building may may nakasulat nga may ginbilin nga bomba sa nasambit nga lugar.
Bangud diri, gilayon nga ginpaguha ang mga tawo sa sulod sang building nga may masobra 100 ka mga tenants nga nagarenta.
Apang makaligad lamang ang pila ka minutos, nagpangayo man sang responde sa mga kapulisan empleyado sang BIR matapos nakabaton sang text messages ang isa nila ka kaupod nga may ginbilin nga bomba sa sulod sang opisina.
Bangud diri, temporaryo nga ginpauntat ang transaksiyon sa nasambit nga opisina kag gin-abisuhan ang mga tawo nga magbiya sa lugar.
Ginlibot sang mga otoridad ang kabilugan sang business center kag nasambit nga opisina dala ang ila nga K9 units, kag wala man sang may nakit-an nga mga bomba.
Bangud sa separado nga ‘bomb threat’ naapektuhan man ang dalagan sang trapiko sa pila ka mga dalanon.
Sa karon padayon nga gina-imbestigaran sang mga otoridad ang nasambit nga insidente.
