ROXAS CITY – Nagalaom ang Capiz Medical Society nga paboran ang ila ginaapelar sa Provincial Inter-Agency Task Force nga 14-day moratorium ukon temporaryo nga pagpaiway sa pagpapauli sa mga Locally-Stranded Individuals (LSI’s) kag Returning Overseas Filipinos (ROF’s) sa bilog nga Capiz.
Ini ang ginpahayag sang bise-presidente sang nasambit nga organisasyon nga si Dr. Victor Federico Acepcion sang mainterview sang Bombo Radyo.
Suno kay Acepcion, base sa ila nga datos, 61.4 porsyento sang mga coronavirus disease (COVID-19) cases sa probinsiya ang mga LSI’s kag ROF’s.
Dako ini nga porsyento sa populasyon suno sa iya kag dako nga risgo nga maglapta ang virus.
Ang Roxas Memorial Provincial Hospital (RMPH) nga amo nga Provincial Designated COVID-19 Facility ang kulang naman sa doctors kag nurses rason nga temporaryo sila nga nag-untat sa pagbaton sang mga COVID-19 kag non-COVID-19 admission.
May mga pribado nga ospital naman suno diri nga nagbaton na sang COVID-19 patients apang limitado man ini kag halos puno na.
Luyag man sang mga ini nga ma re-classify ang quarantine classification sang probinsiya, striktuhon pa ang implementasyon sang minimum health standards, pagpadasig sang pagtukod sang real-time polymerase chain reaction (RT-PCR) testing laboratory, dugang nga health facilities kag personal protective equipments (PPE’s).
Nagaapelar man ang grupo sang mga doktor sa publiko nga magsugid sang tama nga impormasyon sa pagfill-out sang IATF forms kag likawan ang diskriminasyon sa mga healthcare workers.
Nagapanawagan man ini sa gobyerno-nasyunal sang volunteers, doctors kag nurses para sa kampanya sa pagtapna sang COVID-19.
Mahibaluan nga madamo na nga mga medical workers ang nalatnan sang COVID-19 sa probinsiya nga ginalakipan sang mga doktor, nurses, kag nursing attendants.
