ROXAS CITY – Naka-rekord sang ika-duha nga repatriated Overseas Filipino Worker (OFW) nga positibo sa coronavirus disease (COVID-19) ang probinsiya sang Capiz.
Ini ang sandig sa ginpaguwa nga COVID-19 Case Bulletin No. 86 sang Department of Health (DOH) Regional Office 6.
Ang nasambit nga pasyente ang naga-edad sang 33 anyos, babaye, residente sang Cuartero, Capiz kag naka-facility quarantine sa karon.
Suno sa Municipal Health Officer sang nasambit nga banwa nga si Winfred Rivera, gikan sa Dubai ang nasambit nga OFW kag nag-abot sa Metro Manila sadtong Hunyo 8 kun sa diin ginpaidalom ini sa real-time polymerase chain reaction (RT-PCR) test sa amo man nga adlaw kag nagguwa nga negatibo sa nasambit nga balatian pagka-Hunyo 12 rason nga nakapauli ini sa Capiz sadtong Hunyo 13.
Hunyo 15 sang ginpaidalom ini liwat sa RT-PCR test apang nagguwa sa resulta nga positibo ini sa amo nga balatian pagka-Hunyo 20.
Ginkompirmar man ni Rivera nga anom ka bulan nga nagabusong ang nasambit nga pasyente kag makabig ini nga ‘asymptomatic’ case ukon wala nakitaan sang anuman nga sintomas.
Gilayon naman nga gin-transfer sa Roxas Memorial Provincial Hospital, ang provincial COVID-19 facility ang nasambit nga pasyente.
