ROXAS CITY, CAPIZ- Ginkalipay sang Capiz Police Provincial Office ang positibo nga resulta sang 2024 Community-Based Monitoring System (CBMS) Survey nga ginpatigayon sang Philippine Statistics Authority (PSA) Capiz.
Sa interview sang Bombo Radyo kay Police Captain Merry Chris Dela Cruz, Police Information Officer sang Capiz Police Provincial Office, iya ginpahayag nga base sa datos sang nasambit nga survey, 97.42% sang mga Capiznon ang nagsiling nga luwas sila nga maglakat nga solohanon sa ila lugar sa tion sang kagab-ihon.
Suno kay Dela Cruz, ang positibo nga resulta sang survey ang bunga sang mas ginpasangkad nga police presence sa bilog nga probinsya kag ang hugot nga pagpatuman sang 5-Minute Response Policy sang kapulisan.
Dugang pa nya, ang pag-angkon sang malinong, matawhay kag luwas sa katalagman nga komunidad ang isa ka responsibilidad indi lamang sang mga otorodidad kundi sang tagsa ka mha pumuluyo.
Pahayag pa sang natungdan, ang kompleto nga datos sang CBMS ang dako nga bulig sa paghimo sang visualizations sang proximity indicators para sa mga importante nga pasilidad pareho sang evacuation centers, health centers, hospitals, kag daycare centers.
Interviewed by Bombo Sunnie Mae Constantino Batencila
