Nangin “generally peaceful” ang pag-obserbar sang Semana Santa sa probinsya sang Capiz suno sa Capiz Provincial Police Office (CPPO).
Sa interview sang Bombo Radyo kay Police Major Rachelle Garnica, public information officer sang Capiz Provincial Police Office (CPPO), iya ginpahayag nga wala sang may nabalhag nga ano man nga sahi sang kriminalidad nga nagluntad samtang nagapatigayon sang aktibidad ang simbahan.
Suno kay Garnica, apisar may nagluntad nga mga insidente sa pila ka mga banwa sa probinsya, makabig ini nga isolated kag wala sang daku nga epekto sa seguridad nga ginpatuman sang Semana Santa.
Pahayag pa niya, nangin epektibo ang pagpatuman sang seguridad sa mga simbahan, terminal kag pila pa ka mga lugar nga gindugukan sang tawo.
Nagpasalamat man ang natungdan sa kooperasyon sang publiko sa pagsunod sang mga pagsulundan rason nga napabilin ang kalinong kag katawhay sang probinsya.
