ROXAS CITY, CAPIZ – Nagpatigayon sang simulation exercise ang Capiz Police Provincial Office bilang kabahin sang 5-Minute Response Time Strategy sang Philippine National Police.
Sa interview sang Bombo Radyo kay PCOL Albert Tapulao, Provincial Director sang Capiz Police Provincial Office, tinutuyo sini nga siguruhon nga madasig, handa, kag maayo ang koordinasyon sang mga pulis sa panahon sang emerhensya.
Suno kay PCOL Tapulao, duha ka lugar sa Capiz ang ginpadulungan para sa drill: sa Plaridel Street, Roxas City kun sa diin nakaabot ang mga pulis sa sulod sang isa (1) ka minuto kag 23 segundos; kag sa Brgy. Salocon, Panitan kun saan nakaabot ang mga pulis sa sulod sang duha (2) ka minuto kag 13 segundos.
Dugang pa sang natungdan, importante ang kada segundos sa mga emerhensya kag ang madasig nga aksyon ang mahimo nga magluwas sang kabuhi sang tawo.
Suportado sang mga LGU, Bureau of Fire Protection, MDRRMO, barangay officials, kag pila ka pribado nga grupo ang aktibidad nga nagatuyo nga pabaskugon ang kahandaan sang probinsya sa oras sang kalamidad.
– Reported by: Bombo Jessa Mae Siman De Los Santos
