Gin-athag sang Capiz Provincial Health Office nga ang ginatawag nga “superflu” ang isa lamang ka trending nga termino bangud indi ini bag-o nga sahi sang balatian, sa baylo isa gihapon ini ka influenza ukon seasonal flu nga madasig maglapta ilabi na sa nagkalain-lain nga komunidad.
Sa interview sang Bombo Radyo kay Jeza Lorraine Poras, iya ginpahayag nga nga ang influenza mahimo makuha pinaagi sa contaminated surfaces, ilabi na kon ang mga lugar nga ginhalinan ukon ginakadtuan wala gin-disinfect sang insakto.
Suno kay Poras, may nagkalain-lain nga klase sang influenza , ini amo ang Type A nga nagakatabo sa mga seasonal outbreaks, ang Type B amo naman ang seasonal influenza, ang Type C nagaresulta sa mas mahina nga balatian, samtang ang Type D nagaapekto naman sa mga sapat.
Pahayag pa niya, may 41 ka kaso sang influenza sang 2024, 95 ka kaso sang 2025, samtang sa 2026, may yara na sang pito ka kaso nga na-record sa Capiz.
Dugang pa sang natungdan, mahimo malikawan ang nasambit nga balatian pinaagi sa pagsuksok sang mask kun may ubo, pirmi nga paghugas sang kamot, kag pagpahuway kun ginatrangkaso.
