ROXAS CITY – Ginpakamaayo sang Sangguniang Panlalawigan nga ibalik sa Sangguniang Panlungsod sang Roxas City agud rebyuhon ang ordinansa may kahilabtanan sa plano nga pag-broadcast sa publiko sang ‘E-bulang’ ukon online-bulang nga ila una nga gin-kwestiyon.
Ang nasambit nga ordinansa amo ang City Ordinance No. 009-2020 ukon ‘ Ordinance Granting Franchise to United Association of Cockpit Owners and Operators of the Philippines, Incorporated to Broadcast and Data Streamed Cockfighting Activities and Derbies at Commercial Establishments and to Establish, Operate, and Maintain Off-site Cockpit Betting Station within the City of Roxas’.
Mahibaluan nga nangin sentro sang sesyon sang provincial board ang nasambit nga ordinansa kag ang kaundan sini kun sa diin isa si Board Member Mateo Hachuela sa nag-kwestiyon sa nasambit nga plano.
Ginsabat man ni City Councilor JP Arcenas, ang author sang nasambit nga ordinansa, ang mga palamangkutanon sang provincial board pag-abot sa mga probisyon sang amo nga ordinansa.
Diri ginklaro ni Arcenas nga didto patigayunon ang live nga bulan sa Metro Manila kag iga-broadcast lamang diri sa siyudad sang Roxas.
Isa ini sa ginkwestiyon ni Hachuela bangud suno sa opisyal nga dapat kun sa diin nagapatigayon sang bulang, didto man patigayunon ang tay-anay.
Isa pa sa gina-kwestiyon sang provincial board amo ang posibilidad nga indi mapunggan nga mangin imbulbado ang mga menor-de-edad sa online bulang.
