ROXAS CITY, CAPIZ- Ginpakigbahin ni Capiz Vice Governor James ‘Mitang’ Magbanua ang mga ginalauman sini sa gintalakay ni Presidente Ferdinand Marcos Jr. sa iya ika-apat nga State of the Nation Address (SONA) sang Lunes nga adlaw, Hulyo 28, 2025.
Sa interview sang Bombo Radyo kay Vice Governor “Mitang”, iya ginpahayag nga ang natabo nga SONA sang Presidente ang madasig nga intyindihon ilabi na ang mga plano kag programa partikular ang mga nakasentro sa domestic nga isyu kaangay sang sa agrikultura, tubig, kag imprastruktura, kag wala man suno diri sang masyado nga gintalakay hanungod sa mga international nga topiko kaangay sang isyu sa West Philippine Sea.
Dugang pa sini, isa sa mga nag-marka sa iya amo ang plano sang Presidente may kaangtanan sa programa nga ‘Benteng Bigas Meron’ na sa diin nga nakatigana gid para sa mga mangunguma kag yara sa vulnerable sectors. Apisar nga ginsambit sini nga indi pa sa gihapon mabatyagan mayad sang mga mangunguma ang epekto sini sa karon, nagalaum sya nga sa mga masunod nga tuig mahimo na ini nga mapinuslanon para sa mga lokal nga mangunguma.
Bilang sabat sa plano sang Presidente nga himuon digital ang tanan nga transaksyon umpisa sa nasyonal tubtob sa lokal nga gobyerno, gin-esplikar ni Vice Governor ‘Mitang’ nga isa ini ka dako nga tikang padulong sa modernisasyon sang mga serbisyo publiko. Suno sa iya, ang pagpadasig sang mga transaksyon ang magatuga sang mas madasig nga kag mas epektibo nga serbisyo para sa mga pumuluyo, subong man ang mas malapad nga koneksyon sang mga lokal nga karsada kag imprastrukura.
Nagapati si Vice Governor Mitang nga ang mga plano kag programa sang Presidente ang may maayo nga katuyuan kag may potensyal nga magdala sang positibo nga epekto sa pungsod, apang ginhatagan sini pagtamod ang importansya sang nagakaigo nga implementasyon sang mga ini agud masiguro nga ang mga pumuluyo makabenepisyo.
Sa katapusan, nagalaum si Vice Governor Mitang nga ang mga inisyatio sang Marcos Administration ang magabunga sang positibo nga resulta nga mapuslan sang tgasa ka mga pumuluyo sang pungsod Pilipinas.
Interviewed by Bombo Francis Biñas
