ROXAS CITY – Target sang Capizeña lady racer nga si Ms. Cheyenne Ban nga magpasakup kag mangin tiglawas sang Pilipinas sa International Race Women Category sa mga masunod nga tinuig.
Sa interview sang Bombo Radyo kay Ban, ang mga ginapasakupan sini nga karera ang nagaserbe nga training kag experience para sa iya agud mag-improve kag madamo pa sang matun-an pag-abot sa motosports.
Suno diri, madamo sang pagtilaw kag indi nangin madali ang iya naagyan agud ipadayon ang passion sa motor racing apang nagserbe nga inspirasyon ang iya amay nga amu ang presidente sang Brotherhood of Riders-Capiz kag pamilya nga ginasuportahan ang iya huyog.
Matandaan nagkampeon kag nangibabaw ang naga-isahanon nga babayi nga si Ban sa pagtakop sang 2023 season sang Inside Racing Grand Prix sang tinalikdan nga adlaw.
Apisar, nagaisahanon nga babayi sa nasambit nga karera wala nakabatyag si Ban sang pangpaluya ukon intimidation sa mga kasumpong nga kalalakinhan, sa baylo nangin motibasyon niya ini agud pamatud-an nga masarangan kag mangibabaw ang mga kababainhan sa motor racing, sports nga gindominar sang kalalakinhan.
Suno kay Ban, pagsulod sa race track indi kaangay racers ang ginakabig niya nga kontra kundi ang kaugalingon sa diin natanum na sa iya paino-ino nga kinahanglan malampuwasan niya ang kaugalingon nga best lap race record.
Sa pihak sa nasambit nga kadalag-an, aminado si Ban nga ginakulang ini pag-abot sa pinansyal bangud tagsa ka karera ang nagakinahanglan sang daku nga kantidad sang kwarta para sa motor parts kag kagamitan.
Nagahinyu man ini sang suporta sa local government unit sang Roxas kag probinsya nga suportahan ang circuit racing kasubong sa pagsuporta sa iban nga sports.
Sa karon, padayon ang paghanas ni Ban para sa palaabuton nga Inside Racing Grand Prix, sa Tarlac Circuit Hill sa Disyembre 15-17, 2023 sa diin pagasakupan man sang mga international racers.
