CAPSU, nagpaguwa sang official statement natuhoy sa pagkapatay sang criminology student nga naaksidente sa motorsiklo

ROXAS CITY – Nagpaguwa sang official statement ang Capiz State University (CAPSU) natuhoy sa pagkapatay sang isa nila ka estudyante nga si Cristelyn May Villance, 2^nd year criminology student sang CAPSU Dumarao Campus sadtong Mayo 14.

Pirmado ang official statement ni Dr. Editha Alfon, CAPSU president nga ginpadala sa Bombo Radyo.

Katuyuan sini nga maklaro ang naglapta nga isyu nga natabo ang aksidente sa motorsiklo bangud sa pagpangita sang internet sang biktima para makasumiter sang iya nga requirements online.

Paathag sang nasambit nga buluthuan nga matapos nila nga gintsekyar ang record ni Villance, nahibaluan nga nakasumiter na ini sang tanan niya nga requirements sadtong Abril 27 kag 29, 2020 antes pa man natabo ang aksidente.

Bangud diri, nagaapelar ang nasambit nga buluthuan sa publiko nga untatan na ang pagbasol sa eskwelahan kag mangin sa mga manunudlo sini bangud wala sila sang kahilabtanan sa kamatayon sang biktima.

Nagpalab-ot naman sang pagkalisod kag pagpakig-unong ang buluthuan sa pamilya sang napatay nila nga estudyante.