ROXAS CITY – Nagpaguwa ang Catholic Bishops Conference of the Philippines (CBCP) sang mga guidelines agud malikawan ang paglapta sang 2019 Novel Coronavirus sa sulod sang simbahan.
Ini ang ginpahayag ni Monsignor Cyril Villareal, ang Vicar General sang Archdiocese of Capiz sang mainterview sang Bombo Radyo Roxas.
Ginaganyat ni Villareal ang publiko nga mag-upod sa pagpangamuyo sang Oratio Imperata agud mahilway sa mangin halit sa ikaayong lawas sang nagalapta nga nCoV.
Ginpatpat ni Villareal ang mga dapat nga likawan sang mga tumuluo sa tion nga yara sa sulod sang simbahan, una diri ang pagganyat sa mga sumilimba nga ipaagi sa kamot ang pagkalawat kun sa diin ang nagakalawat mismo ang magakuha sang ‘sacred host’ ukon ‘ostia’ apang siguraduhon nga wala sang may nagakabilin sa imo nga tudlo.
Ikaduha, ipaiway ang pag-uyatay sang kamot sa tion sang pagkanta ukon pagpangamuyo sang Amay Namon ukon Our Father.
Ikatatlo, masami nga islan ang containers sang holy water kag pagbutang sang tela sa mga confession boxes.
Ikaapat, likawan man ang paglamano kag paghalok sa mga kaupod kag katupad sa simbahan sa tion sang paghatagay sang ‘peace’.
Ikalima, pagpa-iway sang paghalok sang singsing sang Obispo kag pagbisa sa pari.
Suno kay Villareal nga pinaagi sini maproteksyonan ang tagsa-tagsa kag malikawan ang paglapta sang virus.
Nagapati si Villareal nga ang pagsunod sang mga tumuluo sa CBCP guidelines ang indi makaapekto sa pagtuo sang mga tumuluong Katoliko.
