ROXAS CITY -Ginsabat sang pamunuan sang City Disaster Risk Reduction and Management Office (CDRRMO) ang reklamo sang isa ka ginang nga ginsakay ang bana nga locally stranded individual sa ila kaugalingon nga salakayan padulong sa Hortus Botanicus agud ipaidalum sa rapid test.
Ginpahayag ni City Disaster Risk Reduction and Management Officer Mr. Dennis Saneo nga wala sa protocol ang ginhimo sang ginang nga gindala ang bana sa nasambit nga pasilidad gamit ang kaugalingon nga salakyan.
Suno kay Saneo nga dako ang posibilidad nga malatnan sang virus ang makaupod sa salakyan sang nasambit nga LSI.
Gin-athag sini nga may yara sang mandu sa mga Barangay Officials nga magpangita sang paagi agud mapadul-ong ang mga LSIs nga ipaidalum sa test.
Apang kun wala sang available, mahimo man nga magpakig-angut sa talatapan sang CDRRMO agud mahatagan sang salakyan.
Samtang ginkompirmar man ni Saneo nga wala nagtulog ang ginang kag mga kabataan sa sulod sang quarantine facility.
