ROXAS CITY – Ginkumpirmar sang capizeña ofw nga nagpangayo na sang pasaylo ang airline company nga ginsakyan sini papauli matapos nga nadulaan kag ginbukad ang iya bagahe.
Sa interview sang Bombo Radyo kay Jonavie Vigo, sang Barangay Milan banwa sang Jamindan ginpahayag sini nga nagpangayo sang pasaylo ang airline sa natabo pinaagi sa email.
Sa panaysayon ni Vigo, maluwas sa pasaylo magahatag man ang kumpanya sang cash bilang kabaylo sa mga nagkaladula nga tsokolate kag alahas.
Gin-athag man sang ofw, nga sa Manila Airport natabo ang insidente kag wala sang kahilabtan ang Roxas City airport.
Nauna diri, nakabaton sang tawag si Vigo gikan sa amu nga airlines kun sa din gin-insister sang mga ini nga aksidente ang natabo.
Apang, ginkadismaya ini ni Vigo bangud tuyo nga ginbukad ang iya bagahe kag indi lang aksidente ang gindangatan sang iya bagahe.
Sa karon, ginaimbestigahan na sang kumpanya ang natabo kag iga-review ang mga nakuha nga cctv footages agud mapasabat ang yara sa likod sang insidente.
