IVISAN, CAPIZ – Gin-athag sang pamunuan sang Community Environment and Natural Resources Office (CENRO)-Mambusao nga wala sila nagpatigayon sang imbestigasyon apang nagpatigayon sila sang inspeksyon natuhoy sa reklamo nga ginpalab-ot sa ila opisina nga may yara sang iligal logging ukon iligal nga pagpang-utod sang kahoy sa Barangay Cudian Ivisan, Capiz.
Ini ang ginpahayag mismo ni Forestry Officer I Arlyn Cobrado sa CENRO-Mambusao sang mainterview sang Bombo Radyo.
Suno kay Cobrado nga may yara sang ginsumiter nga dokumento sa ila opisina si Mr. Darren San Antonio nga magapang-utod ini sang mga kahoy sang mahogany sa iya pribado nga duta sa Barangay Cudian Ivisan.
Nahibaluan nga nagpatigayon sang inspeksyon ang CENRO-Mambusao matapos nakalab-ot sa ila opisina ang reklamo natuhoy sa pagpang-utod ni San Antonio sang mga native trees.
Natukiban nga may yara sang Molave Native Tree ang nalakip sa mga gin-utod nga kahoy.
Aminado man si Cobrado nga may yara sang typo-error sa pag type sang petsa sang permit to transport nga ginrelease kay San Antonio sa diin pirmado ini ni Provincial Environment and Natural Resources Officer Ruel Delos Reyes.
Ginpahayag pa ni Cobrado nga kinahanglan may yara sang cutting permit kun native trees ang paga-utdon apang indi mahapos kag madugay ini ang proseso.
Ginklaro man sini nga ang nagahatag sang approval sa mga dokumento nga gina-validate amo ang Regional Office kag ginasumiter gilayon sa Central Office sang DENR ang mga papeles.
Matandaan nga nadismaya si Mrs. Marilou Lorenzo ang tenant sang pribado nga duta ni San Antonio matapos natukiban nga wala sang nagakaigo nga cutting permit gikan sa DENR ang pag-utod sang mga native nga kahoy sa diin ginkakibot sini nga ginhatagan sang certificate to transport ang nasambit nga tag-iya.
Nahibaluan nga nagsugod ang pagpang-utod kag pagpangsarahi sang mga kahoy sadtong bulan sang Setyembre.
Bangud diri, gilayon nga ginpalab-ot ni Lorenzo sa (DENR-PENRO) ang reklamo sa diin gintugyan ini sa (CENRO)-Mambusao ang imbestigasyon sa pag-usisa sang mga permits ni San Antonio.
Pasabton naman si Joel Navarra ang head sang CENRO-Mambusao kun ngaman wala sila nagpatigayon sang imbestigasyon natuhoy sa ginaalegar iligal nga pagpang-utod sang mga kahoy sa banwa sang Ivisan. Samtang, magapatigayon naman sang imbestigasyon ang DENR sa CENRO-Mambusao natuhoy sa reklamo nga ginpalab-ot sa ila ni Lorenzo.
