ROXAS CITY-Ginkompirmar sang hepe sang Roxas City Police Station nga wala nakainom sang makahulubog nga ilimnon ang driver sang motorsiklo sang tion nga aksidente sini nga nabungguan ang naka-park nga 10 wheeler truck sa Barangay Bolo, Roxas City.
Matandaan nga dead on arival si Rogelio Deviente, 50 anyos driver sang Barako 125 kag residente sang Barangay Li-ong sining syudad.
Suno kay Police Lieutenant Colonel Ricardo Jomuad Jr., nag-aregluhanay na ang pamilya sang biktima kag ang driver sang truck kun sa diin nagpromisa nga abagahun sini ang kagastuhanan sa pagpalubong sa nasambit nga biktima.
Sandig sa ginpatigayon nga imbestigasyon sang mga kapulisan, ginapatihan nga nagkaon ang driver sang 10 wheeler truck rason nga gin-park sini ang salakyan sa kilid sang karsada.
Dugang pa sini nga nakaangkon sang madalum nga kapilasan ang biktima bangud sa mabaskog nga pagkabunggo sang ginamaneho sini nga motorsiklo sa truck rason nga madasig ini nga gindalagan sa ospital apang sang ulihi gindeklarar ini nga dead in arrival.
Ginpahayag sini nga madulom ang dalan bangud sa kakulangan sang nagasiga nga street lights.
Gindugang pa sini nga wala sang may ginpahamtang nga early warning devices kag indi reflectorized ang plate number sang truck nga mahimo mangin pahibalo sa mga umalagi nga drivers agud malikawan ang anuman nga aksidente.
Sandig sa imbestigasyon sang mga kapulisan nga posible gintinguhaan pa sang biktima nga likawan ang truck apang ulihi na kag na-sideswipe gid sini kabangdanan nga natumba ang motorsiklo kag ginkalampos sang ulo sang biktima sa karsada.
Samtang, nagpahanumdom man ini sa tanan nga mga drivers nga likawan gid ang magmaneho kun nakainom agud malikawan ang anuman nga sahi sang aksidente sa dalanon.
