ROXAS CITY – Nakabaton sang report ang talatapan sang Criminal Investigation and Detection Group (CIDG) Capiz, nga may ginahuptan nga mga ginaalegar iligal nga armas-luthang ang nadakpan nga negosyante, sa Sitio Puntod, Barangay Dinginan, Roxas City.
Ini ang rason sa pagpatigayon sang surveillance kag pag-apply sang otoridad sang search warrant nga natigayon nga ma-implementar subong nga adlaw sang Biyernes, Enero 27, suno kay Police Captain Danilo Matahum, ang pinuno sang CIDG-Capiz, sang mainterview sang Bombo Radyo.
Suno diri, nagsugod sila sa pagmonitor sa negosyante nga si Adoni Guillergan, 50-anyos, kag residente sang amu nga lugar, sumugod sang una nga semana sang Enero sini nga tuig, tubtob nga nakumpirmar sa Firearm and explosives office sa Camp Crame nga wala sang bisan isa nga armas-luthang nga nakarehistro kay Guillergan.
Narekober sa kuwarto sang negosyante ang 1 ka unit sang super Caliber .38 Colt pistol, M16 Rifle nga lunsay may mga bala kag magazine, apang wala sini ginaaku kun iya ang amu nga mga armas-luthang.
Suno pa kay Matahum nga ginabawalan ang isa ka civilian nga makahupot sang M16 Rifle, bangud para ini sa military ukon police personnel, rason nga ginahibalo nila kun ngaman nakaangkon sini si Guillergan nga wala man ini sang himata nga yara sa militar ukon pulis.
Samtang, nangin cooperative man suno diri ang negosyante sang gin-implementar ang search warrant kag wala man nagbato sa otoridad.
Sa karon, igaturn-over ang mga nakumpiskar nga armas-luthang sa Forensic Laboratory sa Campo agud matumod kun nagamit ini sa mga krimen.
Samtang, igakustodiya sa CIDG-Capiz si Guillergan para sa nagakaigo nga disposisyon.
