ROXAS CITY -Wala pa nabaton sang Sangguniang Panlungsod ang rekomendasyon sang Sangguniang Panlalawigan natuhoy sa operasyon sang ‘E-bulang’ sa siyudad.
Ini ang ginpahayag ni City Councilor John Paul Arcenas sang mainterview sang Bombo Radyo.
Suno kay Arcenas nga wala man sang may nakita nga problema ang Sangguniang Panlalawigan sa ginpapasar nga ordinansa sang Sangguniang Panlungsod natuhoy sa operasyon sang ‘E-bulang’ apang aminado si Arcenas nga may pila ka mga gindugang nga mga rekomendasyon ang Sangguniang Panlalawigan nga luyag ibutang sa ordinansa.
Apang wala pa ini makita kag mabaton ni Arcenas kabangdanan nga indi pa sini matul-id ang mga ginrekomendar sang Sangguniang Panlalawigan.
Liwat man nga ginpanindugan ni Arcenas nga wala sang may nakita nga problema ang konseho sang syudad sa ginpresentar nga mga permits kag dokumento sang United Association of Cockpit Owners and Operators of the Philippines Incorporated.
Samtang aminado naman si Arcenas nga madamo sang mga tag-iya sang mga bulangan ang nagpalab-ut sang negatibo nga reaksyon apang ginpanindugan ni Arcenas nga normal gid lamang nga sa isa ka negosyo may yara sang kompetensya.
Bukas naman ang konseho sang siyudad sa pag-adoptar sang mga rekomendasyon sang Sangguniang Panlalawigan.
