ROXAS CITY -Ginkompirmar ni City Councilor Cesar Yap Jr. nga may yara sang pila ka mga kaupdanan sini sa konseho nga sa malawig nga tion wala nakasuksuk sang facemask samtang ginapatigayon ang session sang Sangguniang Panlungsod.
Ini ang gipahayag ni City Councilor Yap sang mainterview sang Bombo Radyo.
Ginpahayag ni Yap nga may nakita ini nga mga kaupdanan sini sa konseho nga wala nagasuksuk sang facemask rason nga ginpahumdum sini ang bilog nga konseho.
Suno sa kay Yap nga importante sa gihapon ang pagsuksuk sang facemask sa sulod sang session hall bangud luyag sini nga maproteksyonan ang mga kaupdanan sini sa konseho bangud masami nagapadulong ini sa mga ospital kag indi malayo nga ma exposed sa mga may balatian ilabi na sa Covid-19 Disease.
Gindugang pa ni Yap nga indi garantiya ang pag-obserbar sang social distancing agud malikawan nga malatnan sang covid-19 disease, sa balyo mas ginpakamaayo sini nga magsuksuk gihapon sang facemask.
Samtang matapos sang ila healthy debate ni City Councilor Celino, ginkasugtanan sang bug-os nga konseho nga hugot nga ipatuman ang pagsuksuk sang facemask sa tion sang regular session.
Dako naman ang pagpati sini nga posible nalipatan sang pila ka mga kaupdanan sini nga magsuksuk sang facemask.
