ROXAS CITY-Magapatawag sang pagsinapol ang Chairman sang Committee on Infrastructure sang Sangguniang Panlungsod sa maabot nga adlaw sang Biyernes, Oktubre 23 agud hinalaan ang pagresolbar sang lapnagon nga pagbinaha-baha sa pila ka mga barangay sa syudad sang Roxas.
Ini ang ginkumpirmar ni City Councilor Midelo Ocampo sang mainterview sang Bombo Radyo Roxas.
Suno kay Ocampo, madamo nga reklamo ang nabaton sini gikan sa mga pumuluyo may kaangtanan sa malapnagon nga pagbinaha-baha sa syudad sa tion nga magbubu ang ulan rason nga ini ang isa sa mga rason nga nagtulod sa iya agud ipadayon ang maid-id nga pagresolbar sa nasambit nga problema.
Ginpahayag ni Ocampo nga igapatawag sini sa maabot nga sinapol ang City Engineer’s Office, Department of Public Works and Highways kag tagsa ka mga Punong Barangay sang barangay nga masami apektado sang pagbinaha-baha.
Suno sa opisyal nga luyag sini mabatian ang bahin sang tagsa ka mga nasambit nga talatapan kun ano ang mangin suhestyon agud matutukan ang pagresolbar sang pagbaha.
Lakip sa mga barangay nga masami apektado sang mataas nga lebel sang pagbaha amo ang Barangay Tiza, Lawaan, Banica, Balijuagan, Dayao, Cagay kag Mongpong.
Gindugang pa sini nga may pila pa ka mga porsyon sa syudad ang apektado sang pagbaha.
Ginpahayag sini nga isa sa daku nga mabulig sang mga barangay officials para sa amat-amat nga pagresolbar sang pagbinaha-baha ang pinaagi sa paghibalo kag pagtultul kun diin ayhan nga porsyon sang isa ka barangay ang masami ginabahaan.
Suno diri nga nagap.adayon man ang ginapatigayon nga declogging operation sang DPWH sa pila ka mga porsyon sang barangay sa syudad.
