ROXAS CITY – Luyag ni City Councilor Midelo Ocampo nga ipatawag ang mga department heads sang City government, agud maathagan ang konseho angut sa Audit Observation Memorandum (AOM) nga ginpapanaug sang Commission on Audit (COA).
Sa gindul-ong nga diskurso prebiliheyo ni Ocampo, ginpahayag sini nga agud maathagan ang konseho kag ang pumuluyo sang syudad, dapat nga ipatawag ang mga department heads agud sabton kun ano nga mga propedad ukon equipment ang indi makita kag diin nagkadto ang masobra P1.3 bilyon nga Property, Plant, and Equipment (PPE) account balance sang city government.
Apang, ginsabat man ini ni City Councior Atty. Gregory Albert Potato kag ginsegundahan ni City Councilor Trina Ignacio, kag ginpahayag nga ginpahibalo na ni Mayor Ronnie Dadivas ang publiko kag natigayon ini nga masabat pinaagi sa ginpatawag nga press conference.
Sa karon, pagahulaton na gid lamang sang mga katapo sang Sangguniang Panlungsod ang ginahimo nga tikang sang city government angut sa nasambit nga isyu sa COA.
