ROXAS CITY – Ginpatpat sang Chairman sang Committee on Transportation and Public Utilities sang Sangguniang Panglungsod ang ila ginhinala-an sa ginpatigayon nga pagsinapol angut sa ginpapanaog nga Memorandum Circular 036-2020 sang DILG nga nagadumili sa pag-agi sang mga tricycle sa national highways.
Ini ang ginpahayag ni City Councilor Atty. Albert Gregory Potato sang ma-interview sang Bombo Radyo.
Suno kay Potato nga ila gin-identify ang mga lugar nga posible makahimu sang alternative route plan sa syudad sang Roxas.
Ginpanindugan ni Potato nga halos tanan nga dalanon sa syudad ang lunsay mga national highways rason nga wala sang mahimu nga alternative route.
Magluwas diri mas madamo nga mga pasahero ang nagasakay sa tricycle sa baylo nga magsakay sa mga Public Utility Jeepney kag Mini Bus.
Ginapahayag ni Potato nga indi lamang ang mga drivers kag operators ang maapektuhan pananglitan nga istriktuhon ang pagpatuman sang nasambit nga memorandum, bangud kalakip sa maga-antos amo ang riding public.
Gindugang ni Potato nga kinahanglan nila nga magsumiter sang tricycle route plan sa DILG matapos ang 30 dias antes ang implementasyon sini.
Nakita nga aplikable sa memorandum circular 036-2020 ang dalan sa Lawaan Homesite pakadto sa Barangay Lonoy, samtang ang iban ang wala na sang alternative route.
Sa tion nga magpatawag sang pagsinaol ang alkalde sang syudad igarekomendar ni Potato ang pagtukod sang Technical Working Group nga magatutok sa pagtuon sa mga dalanon sa syudad kag makahimu sang tricycle route plan.
Mahibaluan nga ang alternative route plan ang balido lamang sa sulod sang duha ka tuig.
