ROXAS CITY – Ginpasalig sang pamunuan sang City Engineer’s Office nga paga-solusyunan ang ginpalab-ot nga reklamo sang pila ka residente bangud sa pagbaha sa ila lugar sa tagsa ka magbubo ang mamunog nga ulan sa Sitio Jail, Barangay Lawaan, Roxas City.
Suno kay Engr. Noel Lamenares nga base sa ila pagpangusisa, nagsugod ang pagbaha sa lugar kasunod sang pagpatambak sang isa ka pribado nga indibidwal sa iya nga pribado nga duta kun sa diin nasakop sa ginpatambakan ang sadto anay gina-iligan sang tubig kun mag-ulan.
Bangud diri suno sa iya, gilayon sila nga nagpakig-angut sa tag-iya sang duta nga si Butchoy Lim kag ginpasalig man sini nga temporaryo siya nga magahatag sang water pump nga mahimo maggamit agud mapasuyupan sang tubig ang balay sang apektado nga mga residente sa tagsa ka magbubo ang ulan.
Apang suno kay Lamenares, magapatigayon sila sang survey sa nasambit nga lugar kag ila paga-ideyahan kun mahimo diri magpahamtang sang drainage system agud dalayon na nga masolbar ang amo nga problema.
Ginapahayag nga kapin 11 ka mga pamalay ang apektado sa amo nga lugar kun sa diin ginabaha sila sa tagsa ka magbubo ang mamunog nga ulan.
