ROXAS CITY – Hugot nga ginapatuman sang City Health Office ang monitoring, pagpasabat sa Health Declaration Checklist sa mga kabarangayan kag pagpanghatag sang mga flyers sa publiko matapos nga nagpatawag sang pagsinapol ang alkalde sang syudad.
Ini ang ginpahayag ni City Health Officer Dra. Lory Cahilog sang ma-interview sang Bombo Radyo.
Suno kay Cahilog nga nagalibot sila sa mga kabarangayan kag ginapasabtan ang Health Declaration Checklist agud mahibaluan kun may yara sila sang mga indibidwal nga may travel history gikan sa China, Hongkong kag Macau.
Nagahinyo sang kooperasyon sa publiko si Cahilog nga indi pagtaguon ang mga himata nga gikan sa iban nga pungsod nga apektado sang coronavirus.
Ginatugyan ni Cahilog sa mga Barangay Health Workers nga sila na ang bahala sa pagpalapnag sang impormasyon natuhoy sa coronavirus.
Nagapadayon naman ang pagpanagtag sang mga flyers natuhoy sa novel coronavirus sa mga kabarangayan.
