ROXAS CITY – Ginsabat sang City Health Officer kag in-charge sang Hortus Botanicus ang mga ginpalab-ut nga concerns sang mga naka-quarantine nga mga Returning Overseas Filipinos ukon ROF’s sa nasambit nga pasilidad.
Una nga ginsabat ni Dr. Lory Cahilog ang wala sini pagpahanugot nga makaguha ang mga repatriates sa pasilidad samtang wala pa nagguwa ang resulta sang ila RT-PCR test.
Ginpahayag ni Cahilog nga apisar nga may yara ini sang pahanugot gikan sa DOH, indi magpasugot ang city government nga makaguha ang mga repatriates nga wala pa nag-abot ang resulta sang RT-PCR test.
Ginpanindugan ni Cahilog nga yara sa house rules sang pasilidad nga ang mga repatriates ang dapat magpaninlo sang ila mga hulot.
Apang may yara man suno kay Cahilog nga mga repatriates nga nagapaninlo sa ila mga tagsa ka mga hulot sa pasilidad.
Ginsabat man sini ang reklamo sang mga repatriates natuhoy sa mga ginaserbi nga pagkaon sa pasilidad.
Suno kay Cahilog nga bastante ang pagkaon nga ginaserbe sa mga repatriates kag nanari-sari nga mga putahe naman ang ginakapaon sa ila.
Wala man ginapahanugutan ang mga himata sang repatriates nga magdul-ong sang ila mga niluto nga pagkaon sa pasilidad agud malikawan nga magka diarrhea ang mga repatriates.
Samtang, ginpakamaayo ni Cahilog nga kuhaon ang pangalan sang ginaalegar mga frontliners nga nagapakita sang malain nga batasan sa mga repatriates.
Mahibaluan nga indi pa matumod sa karon ang ginareklamo nga mga frontliners sang mga repatriates.
Apang, nagpasalig ini nga ila abisohan ang mga frontliners nga nakaduty sa nasambit nga pasilidad
