ROXAS CITY – Nakabaton sang P5-million nga ayuda ang gobyerno sang syudad bilang bulig sa mga naapektuhan sang paglaslas sang bagyo nga Ursula sang tinalikdan nga tuig 2019.
Ang nasambit nga bulig ang nagikan sa Office of the President nga dala ni Senator Christopher Lawrence Bong Go kadungan sang iya paghatag sang pondo sang Malasakit Center sa Roxas Memorial Provincial Hospital.
Suno kay Dadivas nga tuman ang iya nga pagpasalamat bangud ang nasambit nga ayuda ang dako nga bulig para sa mga naapektuhan sang bagyo.
Gindugang pa ni Dadivas nga igapanghatag ang nasambit nga ayuda sa mga residente nga totally-damaged ang ila mga puluy-an.
Mahibaluan nga masobra 7, 000 ka mga households ang nakalista sa totally damaged nga mga puluy-an matapos nga ini ang gin-validate.
Ginpasalig ni Dadivas sa mga pumuluyo sang syudad nga may yara sila sang pagabatunon nga ayuda gikan sa mga ginpanghatag nga bulig sang pila ka mga ahensya sang gobyerno.
Sa nakuha nga impormasyon sang Bombo Radyo News Team, P10 million ang ginhatag kay Capiz Governor Esteban Evan Contreras para sa mga residente sang probinsya kag tag-P3 million naman para sa kada munisipyo magluwas sa banwa sang Pontevedra nga ginhatagan sang P5 million.
Ang nasambit nga mga ayuda ang igapanghatag para sa mga indibidwal nga nahalitan sang nasambit nga bagyo.
